Білім – барлық уақытта құнды. Соңғы кезде « уақыт өте келе технологиялар дамып, білімнің маңыздылығы төмендейді», - деген болжамдарды естіп жатамыз. Алайда, берік білім, кәсіби шеберлік және кең дүниетаным әрқашан жоғары бағаланады.

Білімді азаматтар - кез-келген мемлекеттің байлығы. Елде жоғары білімі бар адамдар неғұрлым көп болса, бұл ел соғұрлым «білімді» болып, ондағы өмір деңгейі неғұрлым жоғары болады. Интеллектуалды және мәдени өмір қаншалықты бай болса, соғұрлым экономика саласы да дами түседі.

«Білімді адам» қандай адам? Бұл өз ісінің маманы ма? Әрине бұл да бар, «білімді адам» - әрдайым кәсіби маман. Бірақ өз саласының жақсы маманы болу «білімді адам» болып саналу үшін жеткіліксіз.

Менің ойымша, білім - бұл адамның өмірдің негізгі салаларындағы құзыреттілігі, кең көзқарасы, эрудициясы, мәдениеттен, саясаттан және экономикадан хабардарлығы. Білімді адам, бір сөзбен айтқанда, айналасында болып жатқан оқиғаларға қызығушылық танытып, дамып отыратын адам, өзінің мүмкіндіктерін кеңейтетін, өз шекараларын үнемі алға шығаратын адам. Сонымен қатар, білім беру саласы мемлекет үшін «стратегиялық» бағыт, оның тұрақты және табысты болашағының кепілі, ұлт пен елді сақтау кепілі екендігі айқын. Бірақ бұл саланы дамыту және жетілдіру қажет, білімнің сапалы болуын қамтамасыз ету үшін айтарлықтай күш салу қажет, және білімді (шынайы білімді) адамдар көбеюіне жағдай жасалуы қажет. Менің ойымша, бұл ересек ұрпақтың келешек ұрпаққа дарыта білу қабілеті және парызы болып көрінеді.

Сонымен, жеке мемлекет шеңберінде білім беруді қазіргі ұрпақтың өз ұрпақтары - болашақ ұрпақ алдындағы міндеттемесі ретінде қарастыруға болады. Кез-келген ата-ана баласының абыроймен, бақуаттылықпен өмір сүргенін қалайды. Жақсы білім белгілі бір деңгейде осындай әл-ауқаттың кепілі болып табылады. Ересектер балалардың лайықты білім алуына қамқорлық жасай отырып, оларды болашақта өздеріне, жақсы мамандарға және жақсы адамдарға ұсынады. Бұл дегеніміз, жас ұрпақ дамыған елде өмір сүреді және қарт адамдар зейнеткерлік өміріне алаңдамайды. Сонымен, жастардың білім алуы сонымен қатар ата-аналары үшін де жақсы өмірдің кепілі болып табылады.

«Білім - қазіргі ұрпақтың болашақ алдындағы қарызы» ... Бұл сөздер нені білдіреді? Менің ойымша, бұл идеяның «екі жағы» бар. Біріншіден, ересектер буыны балаларға қамқорлық жасауға міндетті - бұл табиғат пен кез келген қоғамның заңы. Демек, қазіргі ұрпақ балаларды ересек өмірге тыныш «жіберу» үшін оларға білім беруге міндетті.

Екіншіден, қазіргі ұрпақ, өз балаларының лайықты өмірін қамтамасыз ету үшін өздері жақсы білім алып, үнемі өздерін де жетілдіріп отыруы керек. Бұл да қазіргі ұрпақтың өз перзенттері, елдің болашақ азаматтары алдындағы парызы.

Білім заманауи қоғамның негізгі құндылықтарының бірі екендігі сөзсіз. Біздің заманауи технологиялар дәуірінде ақпарат ең үлкен байлық болып табылады. «Ақпарат кімге тиесілі болса, сол адам бүкіл әлемге иелік етеді», - деген әйгілі сөйлемді бүгінде көп естиміз. Ақпарат - кез-келген білімнің негізі болып табылады. Сондықтан кімде-кім білім иесі болса, ол әлемге иелік етеді. Болашақ – білімді адамдар мен білімді мемлекеттерге тиесілі. Мен ең озық, білімді елдердің тізімінде өз еліміз, Отанымыз – Қазақстан да жетекші орындардың бірін иеленгенін қалаймын!

У. М. Джолдыбаева Әл-Фараби атындағы ҚазҰУ-нің Қазақстан тарихы кафедрасының доценті.

Ж. Н. Алиасқар Әл-Фараби атындағы ҚазҰУ-нің Шығыстану факультетінің 1-курс студенті.